Parashikimet e “Nostradamusit” për Shqipërinë, 2016!

Nga Marta Kolli

Të gjithë mendojnë se mund t’i vënë pikat mbi I. Ne e dimë se i-ja do vetëm një pikë, po ne as atë nuk e vendosim dot, ndaj këtë rubrikë e kemi quajtur pika pa i- sepse japim veçse një mendim, një reflektim. Më poshtë disa pika që nuk duan  I…

 -ÇEZ paska qenë thesari i shtetit! Ne kemi paguar ato qindrat milionët e eurove që të zhduken. Dhe do paguajmë prapë për to ngaqë u zhdukën. Udhëheqesit tallen me ne dhe ne zihemi për ta se cili është më i miri. (Ndërkohë Viti i Ri na gjeti herë me drita e herë pa drita, po askush nuk u fut në burg për këtë). Dhe ky vend s’ka për t’u bërë më mirë:

-Muzeu Kombëtar do fshihet herë pas herë pas çarcafëve të reklamave dhe s’do ketë fonde per projekte.
-Galeria Kombëtare do vijojë ta ketë fasadeën si ne 90-en dhe s’do ketë fonde për imazh të ri
-Teatrot Kombëtarë do jenë edhe për këtë vit anës pedonales, urojmë të kenë ngrohje dhe të mos na mbysë më era e qofteve dhe e birrave.
-TKOB do vijojë ta ketë buxhetin për faqe të zezë (por të paktën do rikonstruktohet)
-Instituti i Monumenteve të Kulturës, do vazhdojë të ekzistojë
-Universitetet private do vijojnë të jenë një ‘dhomë e kuzhinë’
-Taksat edhe po u mblodhen do ikin në drejtim të paditur paçka “idealeve” dhe “sakrificave” të drejtonjësve. Tatimet për ata që do i mbledhin sivjet janë më të majme falë kuponeve
-Drejtësia do vijojë të jetë e zhdrejtë sipas traditës (dhe rregullit peshku i madh e ha të voglin ‘biri im’)
-Pronarët s’do i marrin as pronat e as kompensimin
– Siteve arkeologjike do u dalin pronarë ish-drejtues të agjencive
-Trashëgimia do vijoje t’u jepet për restaurim shkatërronjësve që e kanë të dokumentuar dëmin dhe ata do dalin të japin mend për restaurimin.(P.s. A morët vesh gjë çfarë u bë me ato vilat e Tiranës që u shmebën në kohën e Bashës? A u ndërtuan ende pallate mbi to?)
-Juritë do vijojnë të jenë të kontestueshme (edhe me të drejtë)
-Qeveria do vijojë të bëjë prokurime të drejtpërdrejta dhe do u thotë mediave spekulim
-Vendet e punës do jenë prapë 300 mijë në fushatën e ardhshme
-Muret do shkarraviten, hapësirat publike do plehërosen, rrugët nuk do shtrohen
-Qytetet do vijojnë të duken si Kandahari
-Njerëzit e drejtë do e kenë sërish rrugën e shtrembër, ndërsa njerëzit e këqinj do përdorin avionë
-INSTAT do tregojë rritje ekonomike që e sheh vetëm ai e qeveria
-Shoqëria do vijojë të funksionojë jo sipas meritokracisë, po sipas servilokracisë, miqokracise dhe parakracisë
-Kush thotë se ky sistem ecën mirë, është pjesë e sistemit.
(P.S. Politikanët do vijojnë të jenë të njëjtët e njësoj, maksimumi do bëjnë operacione plastike që të duken më të bukur para popullit heroik e liridashës)

-Tashmë me biletën e autobusit 40 lekë/për rrugë, jeni të lutur të rrini në shtëpi e të ngroheni me batanije. Rroftë Rilindja e Zoti e bekoftë Shqipërinë për të bërë edhe më Përpara ! 

( Marta Kolli është gazetare e panjohur në rrethet e ngushta ku merren vendime të mëdha ose ku ndahen “favore”. Por, pas studimeve, ajo ka punuar me zell e përkushtim në media të njohura. Mendimet e saj tashmë pa asnjë sitë do të mund t’i lexoni tek Pika pa I, si një mënyrë për të eksperimentuar pak me mendimin)

Lini një Përgjigje

Adresa juaj email s’do të bëhet publike. Fushat e domosdoshme janë shënuar me një *